Veteranët e UÇK-së do të priten sot në takim nga kryeministri i Kosovës, Albin Kurti.
Takimi i tyre parashihet të fillojë në ora 09:00.
Kërkesa për takim ka ardhur nga kryeministri Kurti, pas protestës së veteranëve gjatë ditës së enjte, e cila pengoi edhe zhvillimin e seancës së Kuvendit.
U.d i kryetarit të OVL UÇK, Faton Klinaku nuk është konsultuar dhe nuk e ka marrë miratimin e degëve të OVL UÇK për takim me Kurtin.
Megjithatë, burimet e Paparacit thonë se Klinaku ka shkuar krye në vete, për këtë arsye veteranët nuk kanë qëndrim unik.
Gjatë ditës pritet, të ketë deklarime të degëve rreth këtij takimi.
Kushti i veteranëve për shpërndarje nga protesta e së enjtes ishte që të ndërpritej seanca e Kuvendit, ku duhej të diskutohej për Projektligjin për tërheqjen e kursimeve nga Trusti. Dhe pasi, kryetari Glauk Konjufca, njoftoi për ndërprerje të seancës, edhe protestuesit e thirrur nga organizatat e dala nga lufta e UÇK-së, nisën të shpërndahen.
Veteranët po protestojnë pasi nuk janë përfshirë në Projektligjin për pagën minimale. Qeveria insiston që veteranëve t’u rritet pensioni, por vetëm pas pastrimit të listave.