Aleanca për Ardhmërinë e Kosovës ka kërkuar nga Bashkimi Evropian përgjigje në dy pyetje rreth mungesës së liberalizimit të vizave për Kosovën edhe pas mbledhjes së fundit të Këshillit Evropian javën e kaluar.
Në një konferencë për media të hënën, shefi i Grupit Parlamentar të AAK-së, Besnik Tahiri tha se unioni evropian duhet të sqarojë situatën e mungesës së vendimit për heqjen e vizave.
“Tani, si Grup Parlamentar, i shtrojmë dy pyetje për BE-në: A është kjo një politikë sanskionuese që po i bëhet Kosovës apo Kosova realisht është peng i politikës së brendshme të anëtarëve të Unionit Evropian?”, tha Tahiri të hënën.
Ai e konsideroi të pakuptueshëm faktin që Kosova ka mbetur “vendi i vetëm në Evropë i cili nuk mund të lëviz lirshëm”.
Tahiri ka kërkuar një përgjigje të qartë rreth temës së vizave edhe nga emisari special i Bashkimit Evropian për dialogun Kosovë-Serbi, Miroslav Lajçak.
“Çka do t’u thotë ai [Miroslav Lajçak, v.j] qeverisë dhe partive parlamentare për këtë temë? Nuk mjafton që ai vetëm të ndihet keq që liberalizimi s’po ndodhë”, deklaroi Tahiri.
Në emër të AAK-së, ai propozoi një projekt-rezolutë të re karshi mungesës së liberalizimit të vizave për kosovarët.
“Përmes iniciativës së Aleancës për Ardhmërinë e Kosovës, Kuvendi duhet të miratojë një rezolutë të qartë për pozicionimin tonë drejt integrimit evropian”, tha ai. /Paparaci.com