Gjendje më e rënduar pas vërshimeve që kanë përfshirë pothuajse gjithë Kosovën është në qytetin e Gjakovës. Nga pamjet që vijnë nga atje, shihen rrugë të tëra të vërshuara e të mbuluara nga uji.
Gjithashtu shumë banorë janë detyruar që të dalin nga shtëpitë e tyre të cilat janë rrezikuar si rezultat i vërshimeve.
Në pamjet e publikuara “Syri Vizion” shihet që në rrugën “Shotë Galica” kanë ndërhyrë edhe zjarrfikësit me një barkë shpëtimi.
Aty shihet që është evakuuar një familje, pjesë e së cilës është edhe një foshnje.
Zjarrfikësve u janë vënë në ndihmë edhe banorët e asaj lagjeje.
Ndërkohë uji ka përfshirë edhe objektin e spitalit të qytetit. Sipas pamjeve të publikuara shihet që një pjesë e objektit të spitalit është përmbytur nga uji.
Situata e rënduar është edhe në qytetin e Rahovecit ku shumë fshatra janë vërshuar dhe uji ka arritur në nivele të frikshme.
Kryetari i Rahovecit Smajl Latifi, për Paparacin tha se në Fortesë të Rahovecit ka probleme më serioze.
“Ka probleme serioze, tash për tash ka në Fortesë, më herët ka pasur në Sopiniq, Dobidol, Ratkoc, Xërxë. Tash për tash problemi më i madh është në Fortesë. Normalisht ne prej pas mesnate jemi në terren edhe zjarrfikësit edhe nga mëngjesi i hershëm janë edhe K.R.U. Gjakova, janë operatorët privat, është QKMF-ja. Ne jemi krejt në terren pothuajse plot prej bashkëpunëtorëve s’kanë bërë gjumë, s’kanë shti gjumë në sy. Jemi duke punuar krejt se çka po mundemi”, tha ai për Paparacin.
Latifi ka apeluar te Qeveria që ta ndihmojë komunën në sanimin e kësaj situate.
“Unë qetash jam në takim e kemi mbledh krejt ekipin. Si shtab emergjent unë po e shfrytëzoj rastin edhe po apeloj me na ndihmu Qeveria. Ne si shtab si të stabilizohet situata do të sanojmë gjendjen dhe do t’i njoftojmë komisionet për dëmet të cilat nuk janë të vogla, sidomos në ekonomitë familjare, por ka edhe në stalla dëme. Fatmirësisht nuk ka ndonjë situatë problematike në njerëz. Dëme materiale, dëme ekonomike, dëme në bujqësi, dëme në infrastrukturë ka plot edhe ndihma e Qeverisë është e domosdoshme dhe kritike”, përfundoi ai.