Shtatë ekipet e kombëtareve që ishin bashkuar për kampanjën “One Love” kanë vendosur të heqin dorë nga bartja e shiritit me ngjyrat e ylberit në ndeshjet e Kampionatit Botëror.
Federatat e Futbollit të Anglisë, Uellsit, Belgjikës, Danimarkës, Gjermanisë, Holandës dhe Zvicrës i ishin bashkuar kampanjës “One Love”, duke përçuar kështu një mesazh kundër diskriminimeve të të drejtave të njeriut në Katar, ku po mbahet Kupa e Botës.
Pas kërcënimeve për dënime ndaj kapitenëve që do të bartnin shiritin, shtatë kombëtaret e mëdha kanë vendosur të tërhiqen.
“FIFA ka qenë shumë e qartë se do të vendosë sanksione sportive nëse kapitenët tanë mbajnë shiritat në fushë. Si federata kombëtare, ne nuk mund t’i vendosim lojtarët tanë në një pozicion ku ata mund të përballen me sanksione sportive, duke përfshirë rezervimet, kështu që ne i kemi kërkuar kapitenëve që të mos përpiqen të mbajnë shiritat në ndeshjet e Kupës së Botës FIFA.
“Ne ishim të përgatitur të paguanim gjoba që normalisht do të zbatoheshin për shkeljet e rregulloreve të fanellave dhe kishim një përkushtim të fortë për të mbajtur shiritin në krah. Megjithatë, ne nuk mund t’i vendosim lojtarët tanë në situatën ku ata mund të ndëshkoheshin apo edhe të detyroheshin të largoheshin nga fusha e lojës.
“Ne jemi shumë të frustruar nga vendimi i FIFA-s, i cili besojmë se është i paprecedentë – i shkruam FIFA-s në shtator duke i informuar ata për dëshirën tonë për të mbajtur shiritin “One Love” për të mbështetur aktivisht përfshirjen në futboll dhe nuk patëm përgjigje. Lojtarët dhe trajnerët tanë janë të zhgënjyer. – ata janë mbështetës të fortë të përfshirjes dhe do të tregojnë mbështetje në mënyra të tjera”, thuhet në deklaratën e përbashkët të shtatë federatave të futbollit.