Aleanca për Ardhmërinë e Kosovës (AAK) e ka cilësuar “shok lajm” paralajmërimin e Zyrës së Rregullatorit të Energjisë (ZRrE) për rritjen për 14 për qind të rritjes së energjisë elektrike.
Në një konferencë për media të premten, deputeti i AAK-së, Pal Lekaj ka thënë se nëse ndodhë rritja e çmimit të energjisë, atëherë mund të organizohen protesta.
“Thirrja e kësaj konference për media ka të bëjë me paralajmërimin dhe tentimin e qeverisë për rritjen e çmimit të energjisë elektrike. Ky është një shok lajm për të gjithë qytetarët, bizneset dhe ndërmarrjet e vendit. Kjo është e paarsyeshme dhe jo e pranueshme për të gjithë qytetarët”, ka thënë Lekaj, raporton Paparaci.
“Si është e mundur që KEK-u, në gjendje stabile dhe që ka eksportuar miliona euro energji, atëherë cila është arsyeja e rritjes së çmimit të energjisë”, ka thënë Lekaj.
Lekaj ka thënë se AAK-ja është kryekëput kundër rritjes së çmimit të energjisë elektrike.
“Ne nuk do të lejojmë që shtrenjtimi i rrymës të ndodhë. Do të bisedojmë edhe me qytetarët, që nëse e shohin të drejtë, ne do të kemi edhe protesta”, ka thënë Lekaj.