Ministria e Industrisë, Ndërmarrësisë dhe Tregtisë (MINT), përkatësisht Agjencia për Investime dhe Përkrahjen e Ndërmarrjeve në Kosovë (KIESA), ka njoftuar se ka shpallur konkurs për programin: “Internship Biznesi”.
MINT ka ftuar absolventët dhe të diplomuarit e nivelit bachelor dhe/apo master, por që janë të papunësuar, që të aplikojnë për praktikë në punë.
Për punën praktike, praktikantët do të marrin kompensim prej 250 Euro bruto për muaj nga Buxheti i Kosovës.
Në njoftimin e MINT-it u tha se afati i fundit për aplikim është deri më datë 18 gusht, 2023, transmeton Paparaci.
“Qëllimi kryesor i këtij projekti është ndërtimi i komunikimit dhe bashkëpunimit ndërmjet bizneseve dhe absolventëve dhe/apo të diplomuarve të nivelit bachelor dhe master, si dhe krijimit të mundësive për praktikantë që gjatë kohës së studimeve, njohuritë e fituara të mund t’i transferojnë dhe zbatojnë në praktikë”, thuhet në njoftimin e MINT-it.
Sipas njoftimit nga MINT, puna praktike zgjat tre muaj për periudhën shtator-dhjetor, 2023.
“Puna praktike zgjatë tre muaj dhe planifikohet të realizohet brenda periudhës: shtator – dhjetor 2023 dhe kryhet në ndërmarrjet private të përcaktuara nga KIESA përmes shpalljes publike dhe shprehjes së interesit nga kompanitë dhe nevojat e tyre për të pranuar praktikantë të rinj për të cilët është edhe mundësi potenciale për t’u punësuar”.