Instituti për Politika Sociale, “Musine Kokalari” ka publikuar raportin: Mbështetja për punësimin e grave dhe të rinjëve midis pqartësisë së shumës së paguar dhe efektit që do të arrihet
Të gjeturat e raportit tregojnë për paqartësinë e shumës së subvencionimit nga masat ekonomike për punësimin e grave dhe të rinjëve, pasi që njoftimet nga Ministri i Financave, z. Hekuran Murati në rrjetet e tij sociale japin një shumë më të vogël, krahasuar me llogaritjet nga masat e Pakos për Ringjallje Ekonomike.
Këto janë të gjeturat e raportit të fundit tonë si Institut për Politika Sociale Musine Kokalari:
Sipas masave të Pakos për Ringjallje Ekonomike e cila është miratuar në qershor të vitit 2021, konkretisht masa 1.3, për të cilën janë ndarë 5 milionë euro do të rezultonte me rreth 11 mijë gra të punësuara, në rastin kur subvencioni i paguar arrin shumën maksimale të lejuar me masën.
Atëherë kur shuma e subvencionit është më e vogël numri i përfitueseve do të jetë më i madh. Në anën tjetër, të dhënat japin një shifër po aq të ulët të përfitimit të të rinjve nga masa 1.4 me vetëm 4.902 përfitues, nëse shuma e paguar a subvencionit shkon në kufirin e epërm të masës.
Ndërkaq, të dhënat nga Agjencia e Statistikave të Kosovës vazhdojnë të japin një shkallë të ulët të aktivitetit të grave dhe të rinjve në tregun e punës dhe gjithashtu një shkallë të lartë të papunësisë. Rrjedhimisht këto të dhëna bëjnë që pjesa më e madhe e tyre të mos mund të përfitojnë nga masat e Qeverisë.
Sidoqoftë, e paqartë mbetet shuma e subvencionimit nga këto masa pasi që njoftimet nga Ministri i Financave, z.Hekuran Murati në rrjetet e tij sociale japin një shumë më të vogël, krahasuar me llogaritjet nga masat e Pakos për Ringjallje Ekonomike.
Masat e tilla dhe zbatimi i tyre kanë potencial të madh të shërbejnë si katalizator punësimi për këto dy kategori dhe kështu shpiejnë në një shpenzim më të drejtë të parasë publike. Andaj, ftojmë Qeverinë e Republikës së Kosovës që të jetë më transparente në këtë drejtim.
Raportin e plotë ‘Mbështetja për Punësimin e Grave dhe të Rinjve: Mes paqartësisë së shumës së paguar dhe efektit që do të arrihet’ mund ta lexoni në vegëzën më poshtë.
Ky raport është përkrahur nga Olof Palme International Center.