Ndonëse janë paralajmëruar nga Perëndimi që të mos ndërmarrin një veprim të tillë, Asambleja Popullore e Republikës Sërpska, sot ka miratuar nismën për të transferuar disa kompentenca nga institucionet shtetërore.
Kjo nismë në asamblenë që u zhvillua sot mori 49 vota për 3 kundër dhe asnjë abstenim. Kurse, deputetët e opozitës u larguan nga mbledhja para votimit, shkruan REL, transmeton Paparaci.
Nisma parasheh nisjen e një procedure të atillë që entiteti me shumicë serbe brenda Bosnje dhe Hercegovinës të tërhiqet nga ushtria boshnjake, shërbimet e sigurisë, sistemi i taksave dhe sistemi juridik.
Bosnja ka qenë në një krizë të stërzgjatur politike lidhur me lëvizjet ndarëse nga Republika Srpska, duke ringjallur frikën se marrëveshja e paqes që i dha fund një lufte të viteve 1992-95 mund të shpërbëhet dhe të kërcënojë stabilitetin rajon.
Më poshtë janë vendimet kryesore që mund ta dërgojnë shtetin boshnjak drejt shpërbërjes.
1. Bartjen e kompetencave tek Republika Serbe në nivelin e Bosnje-Hercegovinës;
2. Bartjen e kompetencave në fushën e tatimit indirekt;
3. Bartjen e kompetencave të sistemit të drejtësisë tek Republika Serbe në nivelin e Bosnje-Hercegovinës;
4. Bartjen e kompetencave në fushën e mbrojtjes dhe sigurisë tek Republika Serbe në nivelin e Bosnjës-Hercegovinës;
5. Deklarata mbi Parimet Kushtetuese.
Ndryshe, këto konkluzione hyjnë në fuqi një ditë pas miratimit të tyre.