Shefi i Grupit Parlamentar të Partisë Demokratike të Kosovës, ka thënë se Qeveria e Kosovës do duhej të jepte dorëheqje pas skandalit të arrestimit të kryeshefit të Ujësjellësit të Gjakovës, Hasan Krasniqi, nën dyshimin për trafikim me njerëz në Bullgari.
Tahiri, në seancën e jashtëzakonshme të Kuvendit të Kosovës të enjten, tha se arrestimi i Krasniqit dhe ekstradimi i tij drejt Italisë, “është skandal ndërkombëtar”.
“Qysh është e mundshme një ministres si Rizvanollit i arrestohen tre kryeshefa të ndërmarrjeve publike. Ragip Krasniqi, Faruk Mujka dhe pastaj e kemi Kryeshefin e KRU Gjakovës, që është rasti më eklatant dhe më i tmerrshëm, që arrestohet në një shtet tjetër dhe ekstradohet në Itali”, tha Tahiri.
“Dëgjoni, për këtë të fundit qeveria duhet me shku në shpi, jo ministrja. Me t’u arrestu dhe ekstradu në Itali një zyrtar i shtetit, po a dini more çfarë skandali është ky”, tha ai.