Një grabitje me armë zjarri ka ndodhur pak më parë në Mitrovicë, ku ka mbetur i plagosur një person.
Ljmin e ka konfirmuar edhe zëdhënësi i Policisë për rajonin e Mitrovicës, Avni Zahiti.
“Sonte, rreth orës 22:24, policia në Mitrovicë, ka pranuar informacion për të shtëna me arme zjarri në rrugën ‘Mbretëresha Teutë’ në Mitrovicë. Me të pranuar informacionin, në vendin e ngjarjes, me urgjencë, kanë dalë të gjitha njësitet e nevojshme policore. Nga informacionet e para nga vendi i ngjarjes, bëhet e ditur se i plagosur nga arma e zjarrit kishte mbetur viktima/mashkull kosovar, i cili me urgjencë është dërguar në Spitalin Rajonal në Mitrovicë”, deklaroi Zahiti.
“Nga hetimet fillestare bëhet e ditur se dy persona të dyshuar e të maskuar nën kërcënimin e armës kanë tentuar të grabitin viktimën, i cili ndodhej në dyqanin e tij. Si pasojë e të shtënave nga të dyshuarit në drejtim të viktimës, viktima ka mbetur i plagosur”, tha Zahiti.
“Lidhur me rastin janë ndërmarrë veprime të shpejta policore, janë identifikuar dhe arrestuar dy persona të dyshuar si dhe është sekuestruar një armë”, shtoi ai.