Të hënën më 28 tetor do të zhvillohet ceremonia e 68-të e Topit të Artë të organizuar nga France Football.
Pikërisht sot do të mësojmë se cilët ishin trajnerët, sulmuesit, portierët më të mirë në sezonin e kaluar, por edhe më e rëndësishmja se kush ishte lojtari më i mirë.
Edhe sulmuesi legjendar Thierry Henry ka dhënë mendimin e tij se kush duhet ta fitojë Topin e Artë.
Ai nuk pajtohet me narrativën popullore se fituesi duhet të jetë ylli i Real Madridit dhe Brazilit, Vinicius Jr.
Sipas tij, çmimi duhet të shkojë për spanjollin Rodri, i cili luan për Manchester Cityn.
“Njerëzit harrojnë se çfarë bëjnë mesfushorët dhe cili është roli i tyre. Vërtetë, ai nuk e fitoi Champions League, por mori kampionatin evropian dhe fitoi ligën me klubin. Sigurisht që ai nuk ka aq shumë gola dhe asistime, por ai është shpirti i një prej skuadrave më të mira në botë”, tha Henry në emisionin e Champions League në CBS.
Kolegu i tij në emision, Jamie Carragher, nuk u pajtua me francezin.
“Mendoj se Vini duhet të fitojë. Ata fituan Ligën e Kampionëve, që është trofeu më i madh. Sulmuesit zakonisht i fitojnë këto çmime dhe prandaj paguhen më së shumti”, përfundoi ish-lojtari i Liverpool-it.