Policia e Kosovës ka arrestuar një person në Shtime me dyshimin për mbajtje në pronësi, kontroll ose posedim të paautorizuar të armëve.
Ngjarja ka ndodhur sot, kur stacioni policor në Shtime ka marrë një informatë lidhur me posedimin e armës nga një person nga fshati Reçak.
Sipas njoftimit, i dyshuari ishte paraqitur në një fotografi duke mbajtur një armë zjarri, pas së cilës janë ndërmarrë veprimet operative nga njësitet policore. Me urdhër të prokurorit të shtetit, është realizuar një kontroll në shtëpinë e të dyshuarit.
Gjatë kontrollit, nuk është gjetur armë zjarri, por janë sekuestruar dy uniforma ushtarake, tre jelekë taktikë dhe disa pajisje të tjera. I dyshuari është shoqëruar në stacionin policor dhe është intervistuar nga hetuesit. Pas intervistimit, me vendim të prokurorit, ai është dërguar në mbajtje për 48 orë.
Rasti është duke u hetuar nga sektori i hetimeve të Policisë së Kosovës.