Franca ka njohur zyrtarisht shtetin e Palestinës, duke u bashkuar me një valë vendesh të tjera që kanë ndërmarrë të njëjtin hap gjatë fundjavës, përfshirë Mbretërinë e Bashkuar, Kanadanë, Australinë dhe Portugalinë.
Presidenti francez Emmanuel Macron e bëri njoftimin gjatë një fjalimi në Kombet e Bashkuara, ku deklarata e tij u prit me duartrokitje.
“Ne duam që dy shtete të jetojnë krah për krah në paqe dhe siguri – që kjo të bëhet realitet,” u shpreh Macron.
Duke iu referuar gjendjes aktuale në Rripin e Gazës, ai shtoi:
“Aktualisht, Izraeli po zgjeron më tej operacionin e tij ushtarak në Gaza me objektivin e shpallur për të shkatërruar Hamasin. Por qindra mijëra njerëz janë zhvendosur, janë plagosur, janë të uritur dhe të traumatizuar.”
Ky hap i Francës pritet të rrisë presionin ndërkombëtar për një zgjidhje të qëndrueshme dhe të drejtë të konfliktit izraelito-palestinez, me theks të veçantë te zgjidhja me dy shtete.
Njoftimi vjen në një kohë kur tensionet dhe dhuna në rajon janë përshkallëzuar ndjeshëm, dhe gjithnjë e më shumë vende po i bëjnë thirrje komunitetit ndërkombëtar të veprojë për t’i dhënë fund konfliktit.