Pak minuta më parë, kryeministri i Izraelit, Benjamin Netanjahu ka mbërritur në Shtëpinë e Bardhë ku është pritur nga presidenti amerikan, Donald Trump.
Derisa shtrënguan duart, nga distanca u dëgjuan edhe pyetjet e gazetarëve se nëse pritet të arrihet armëpushimi në Gaza.
“Jam shumë i bindur”, ishte përgjigja e Trump.
Në fokus të bisedimeve në Shtëpinë e Bardhë do të jetë plani 21 pikësh për përfundimin e luftës në Rripin e Gazës.
“Ne kemi një mundësi reale për madhështi në Lindjen e Mesme. Të gjithë janë pajtuar për diçka shumë speciale, për herë të parë në histori”, njoftoi presidenti amerikan përmes rrjeteve sociale, para takimit me Netanjahun.
Kjo është vizita e katërt e kryeministrit izraelit në Amerikë që prej nisjes së mandatit të dytë të Donald Trump si president i SHBA-së.