Besim Mulaj, kandidat për deputet nga radhët e Lidhjes Demokratike të Kosovës, ka treguar pesë angazhimet e tij kryesore si deputet i Kuvend të Kosovës.
Mulaj, i cili në listën e LDK-së mban numrin 79, përmes një postimi në Facebook ka listuar pesë angazhimet e tij të para si deputet.
Ai ka thënë se premtimet e tij nuk janë boshe, por do t’i përmbahet atyre me përgjegjësi të plotë.
“Zëri i qytetarëve në Kuvend: Çdo shqetësim që vjen nga ju do të ketë adresë të drejtpërdrejtë në Kuvend. Do të jem aty për të dëgjuar, përfaqësuar dhe kërkuar zgjidhje reale.
Votim vetëm për interesin e Kosovës: Ligjet dhe të zgjedhurit do t’i mbështes vetëm atëherë kur janë në interes të shtetit dhe qytetarëve, e kurrë për grupe të vogla interesi apo pazare politike.
Ligje që hapin derën për investime: Angazhohem për ndryshime ligjore që krijojnë një ambient më të mirë ekonomik dhe që e bëjnë Kosovën vend tërheqës për investime dhe vende të reja pune.
Luftë e pandalshme kundër monopoleve: Do të jem i palëkundur në betejën kundër monopoleve që dëmtojnë konkurrencën e lirë dhe rëndojnë jetën e qytetarëve.
Infrastrukturë që zhvillon rajonin: Lobim i vazhdueshëm për përfundimin e projekteve të nisura, me prioritet rrugët Pejë–Rugovë, Klinë–Istog dhe rruga Kalliqan në Bjeshkë – projekte që sjellin zhvillim dhe perspektivë”, thuhet në postimin e Mulajt.