Dhoma e Përfaqësuesve e Shteteve të Bashkuara miratoi një projektligj të ri që parashikon ndihmë të konsiderueshme për Ukrainën dhe vendosjen e sanksioneve ndaj sektorëve kyç të ekonomisë ruse.
Projektligji kaloi me 226 vota pro dhe 195 kundër, pavarësisht kundërshtimeve të një pjese të republikanëve, të cilët argumentuan se masa mund të dëmtojë negociatat diplomatike që synojnë arritjen e një marrëveshjeje më efektive.
Legjislacioni është paraqitur nga kongresmeni demokrat i Nju Jorkut, Gregory Meeks, dhe synon të forcojë mbështetjen amerikane për Kievin në një moment kritik të luftës me Rusinë. Paketa përfshin mbi 1 miliard dollarë ndihmë për sigurinë dhe rindërtimin e Ukrainës, si dhe 8 miliardë dollarë të tjerë në formën e kredive për mbrojtjen e vendit.
Në votimin në Dhomën e Përfaqësuesve, projektligji mori mbështetjen e 207 demokratëve, 18 republikanëve dhe një ligjvënësi të pavarur. Ndërkohë, demokratja Ilhan Omar iu bashkua 194 republikanëve duke votuar kundër nismës.
Mbështetësit e projektligjit shpresojnë se miratimi në Dhomën e Përfaqësuesve do të rrisë presionin mbi Senatin për ta kaluar gjithashtu paketën. Megjithatë, vëzhguesit politikë vlerësojnë se rruga drejt miratimit përfundimtar mbetet e vështirë.
Sipas tyre, Senati ka pak gjasa ta miratojë projektligjin nëse ai nuk merr mbështetjen e Presidentit Donald Trump. Për këtë arsye, vëmendja tashmë është përqendruar te qëndrimi që do të mbajë administrata amerikane ndaj paketës së re të ndihmës për Ukrainën dhe sanksioneve ndaj Rusisë.