Anglia e Thomas Tuchel ka siguruar vendin në fazën e 32-të të Kupës së Botës, pasi rezultatet në Grupin H garantuan se ekipi do të kualifikohet, në rastin më të keq, si një nga skuadrat më të mira të vendit të tretë. Humbja e Uruguait ndaj Spanjës, e shoqëruar me barazimin e Kepit të Gjelbër me Arabinë Saudite, e la ekipin e Marcelo Bielsës në vendin e tretë me një rekord më të dobët se ai i Anglisë.
Me Korenë e Jugut, Senegalin dhe Skocinë që nuk mund të barazojnë numrin e pikëve të Anglisë, kualifikimi për ekipin e Tuchel është konfirmuar. "Tre Luanët" do të përballen me Panamanë në ndeshjen e fundit të grupit të shtunën. Një fitore ndaj përfaqësueses së Amerikës Qendrore do t'i garantonte Anglisë vendin e parë në Grupin L.
Një barazim ose humbje mund ta dërgojë Anglinë në vendin e dytë ose të tretë, gjë që mund të sjellë një kundërshtar më të vështirë në fazën e eliminimit direkt. Nëse Anglia përfundon e para, do të përballet me një ekip të vendit të tretë që ende nuk është përcaktuar.
Reece James do të mungojë në ndeshjen kundër Panamasë dhe në atë të 32-shes për shkak të një dëmtimi në muskulaturën e kofshës (hamstring). Mbrojtësi i djathtë raportoi shqetësime pas barazimit 0-0 të Anglisë kundër Ganës në Boston, të martën. Anglia e nisi turneun me një fitore 4-2 ndaj Kroacisë, ndeshje në të cilën Harry Kane shënoi dy gola.
Duke folur të premten, Tuchel u shpreh se ka besim te mundësitë e ekipit të tij për t'u përballur me çdo kundërshtar. "Nuk jam i frikësuar në përgjithësi. Ndjehemi mjaft të sigurt për të qenë gati dhe për të konkurruar në çdo nivel," tha trajneri. Ai shtoi se e konsideron grupin e tyre si një nga më të vështirët dhe se fokusi mbetet te gjërat që ekipi mund t'i ndikojë.
Burimi: theguardian.com