16 persona dyshohet se janë helmuar nga ushqimi, pasi kanë konsumuar sanduiçë në një nga pikat e rrjetit të restoranteve “Sach Pizza” në Prishtinë.
Pacientët kanë kërkuar ndihmë mjekësore dhe që nga e premtja po marrin trajtim në Klinikën Infektive të Qendrës Klinike Universitare të Kosovës (QKUK).
Nga Klinika Infektive kanë konfirmuar se 16 persona janë të hospitalizuar, ndërsa tre prej tyre kanë pranuar trajtim të dielën.
“ Të hospitalizuar janë 16 pacientë që nga e premtja, në mesin e tyre tre kanë ardhur këtë të diel”, ka deklaruar Izet Sadiku, shef i ndërrimit në Klinikën Infektive.
Mjekët janë duke pritur rezultatet e analizave laboratorike për të përcaktuar shkakun e saktë të helmimit dhe për të kuptuar nëse gjendja e pacientëve është shkaktuar nga ushqimi i konsumuar.
Familjarë të disa prej pacientëve kanë deklaruar se dyshojnë që sanduiçët mund të kenë qenë të ngrirë dhe më pas të ngrohur para konsumimit.
Nëna e një 22-vjeçari, i cili është shtruar në Klinikën Infektive mbrëmjen e kaluar, ka treguar se djali i saj kishte konsumuar ushqim në një nga restorantet e rrjetit “Sach Pizza”.
Ndërkohë, njëri prej pacientëve ka deklaruar jozyrtarisht se 16 persona janë të shtrirë vetëm në një kat të Klinikës Infektive, ndërsa raste të tjera po trajtohen edhe në hapësira të tjera të klinikës.
Policia e Kosovës është kontaktuar për të dhënë informacione lidhur me rastin, por deri të dielën pasdite nuk ka pasur ndonjë deklarim zyrtar.
Televizioni ka tentuar të kontaktojë edhe përfaqësuesit e “Sach Pizza”, por nuk ka arritur të marrë një përgjigje. /GazetaExpress