Kombëtarja e Spanjës ka vazhduar stërvitjen në ambient të hapur në East Hanover të New Jersey-t, përpara finales së Kampionatit Botëror kundër Argjentinës. Kjo ndodhi pavarësisht thirrjeve nga ekspertët që skuadra të stërvitet në ambiente të mbyllura, për shkak të tymit nga zjarret që ka mbuluar pjesë të mëdha të Shteteve të Bashkuara.
Mesfushori Mikel Merino deklaroi të premten se mund ta shohë dhe ta nuhasë tymin që vjen nga zjarret në Kanada, por theksoi se po përpiqet të mos përqendrohet te ky faktor. “Për një ndeshje kaq të rëndësishme si finalja e Botërorit, duhet të jesh në gjendje t’i shpërfillësh faktorët e jashtëm sa më shumë që të jetë e mundur,” tha Merino.
Deri në momentin e publikimit, FIFA dhe Federata Spanjolle e Futbollit nuk u janë përgjigjur pyetjeve nëse është marrë parasysh mundësia e stërvitjes në ambiente të mbyllura. Organizata Botërore e Shëndetësisë parashikon një përmirësim të cilësisë së ajrit në nivelin “mesatar” në East Rutherford.
Mark Parrington, shkencëtar i lartë në Copernicus Atmosphere Monitoring Service, shpjegoi se situata mbetet e pasigurt për shkak të reshjeve të pritshme të shiut të shtunën. Sipas tij, nëse intensiteti i zjarreve rritet, është e mundur që një masë tjetër ajri me tym të mbërrijë në zonë të dielën. Shkencëtarët këshillojnë minimizimin e aktiviteteve fizike në natyrë kur ajri është i ndotur, për shkak të rreziqeve për shëndetin respirator dhe kardiovaskular.
Presidenti Donald Trump pritet të takohet me presidentin e FIFA-s, Gianni Infantino, për të diskutuar rreziqet shëndetësore të shkaktuara nga tymi. Finalja do të zhvillohet në stadiumin e hapur në Meadowlands, ku pritet të jenë të pranishëm rreth 80,000 tifozë. Ky stadium është shtëpia e ekipeve të NFL-së, New York Giants dhe New York Jets.
Burimi: independent.co.uk