Kompania mediatike e presidentit të Shteteve të Bashkuara, Donald Trump, po shqyrton mundësinë e vendosjes së një tarife mujore prej 100,000 dollarësh për tregtarët dhe firmat financiare që kërkojnë akses të përparuar në postimet e tij në rrjetet sociale. Lajmi është raportuar nga agjencia Reuters, duke ngritur shqetësime të mëdha etike lidhur me transparencën qeveritare dhe përfitimet e mundshme personale nga posti i presidentit.
Ekspertët e etikës kanë kritikuar ashpër këtë propozim. Kathleen Clark, eksperte për rregullat e konfliktit të interesit në Washington University School of Law, deklaroi për agjencinë Associated Press se ky veprim përbën një shfrytëzim të padrejtë të pushtetit qeveritar për pasurim personal.
Trump, i cili zotëron një pjesë të madhe të aksioneve në Trump Media and Technology Group, e përdor platformën Truth Social pothuajse ekskluzivisht që nga viti 2021. Deklaratat e tij në këtë rrjet social, të cilat shpesh lidhen me politika tregtare apo konflikte ndërkombëtare, kanë pasur ndikim të drejtpërdrejtë në tregjet financiare globale.
Të enjten, Trump Media and Technology Group njoftoi se do të ofrojë një shërbim të licencuar të të dhënave, të quajtur “Truth API”, për bankat dhe firmat tregtare.
Ky njoftim ka hasur në kundërshtime nga ligjvënësit demokratë. Senatori Ron Wyden ka kritikuar iniciativën, duke vlerësuar se ajo do të shërbejë për të pasuruar tregtarët e Wall Street-it, së bashku me familjen Trump. Për shkak të fuqisë së tij për të ndikuar në tregjet globale, çdo deklaratë e presidentit në këtë platformë shihet si një faktor me peshë të madhe ekonomike.
Burimi: aljazeera.com