Bukayo Saka shënoi tre gola në fitoren 6-4 të Anglisë ndaj Francës, duke i siguruar kombëtares së tij medaljen e bronztë në Kampionatin Botëror. Pas ndeshjes, anësori anglez pranoi se dëshironte të kishte luajtur më shumë gjatë turneut, pasi ishte lënë jashtë formacionit fillestar në humbjen e gjysmëfinales ndaj Argjentinës.
Duke folur për BBC pas ndeshjes për vendin e tretë, Saka u shpreh: "Sigurisht që do të kisha dashur të luaja më shumë. Por nuk është koha për të folur për këtë tani. Unë përpiqem të flas në fushë. Ka kaluar tani, duhet të ecim përpara".
I pyetur nëse është lajm i mirë për tifozët e Arsenalit fakti që ai është në formë dhe po shënon, Saka konfirmoi: "Po, jam mirë. Jam në formë". Nga ana tjetër, Tuchel shpjegoi se vendimi për gjysmëfinalen ishte bazuar në një ndjesi personale se Rogers do të ofronte diçka të veçantë. Trajneri gjithashtu pranoi se Saka është një lojtar kyç për ekipin.
Saka hyri në kampionat me probleme fizike që e kishin shoqëruar në fund të sezonit me Arsenalin, duke humbur dy ndeshjet e para të turneut. Në total, ai e mbylli turneun me tri gola dhe tri asistime.
Pavarësisht fitores së medaljes së bronztë, performanca e Anglisë në këtë Botëror ka lënë pikëpyetje mbi vendimet taktike të Tuchel-it. Përkundër epërsisë së hershme, Anglia pati vështirësi në mbrojtje ndaj Francës, duke rrezikuar të humbiste avantazhin e krijuar. Tuchel deklaroi se ndeshja ndaj Francës ishte hapi i parë për të ngushtuar hendekun me ekipet e mëdha, ndërsa tani fokusi zhvendoset te përballja me Spanjën në Ligën e Kombeve.
Burimi: skysports.com