Ministri i Jashtëm i Iranit, Abbas Araghchi, ka konfirmuar se Turqia luajti një rol “efektiv” në parandalimin e një ofensive të grupeve të armatosura kurde, të cilat sipas tij synonin të hapnin një front të ri brenda Iranit. Në një intervistë të zhvilluar të dielën me Javad Moghouei, Araghchi deklaroi se kjo përpjekje ishte pjesë e një plani të mbështetur nga SHBA-ja dhe Izraeli për të nxitur një kryengritje nga rajoni i Kurdistanit irakian.
Araghchi bëri të ditur se kishte kontaktuar Kryeministrin irakian Mohammed Shia al-Sudani, udhëheqësit kurdë të Irakut dhe Ministrin e Jashtëm turk, Hakan Fidan, pasi kishte marrë raporte se Presidenti amerikan Donald Trump po diskutonte plane për “fragmentimin e Iranit”. Ai tha se i kishte paralajmëruar këta zyrtarë se Irani do të përgjigjej ndaj çdo kërcënimi që do të vinte nga rajoni i Kurdistanit të Irakut.
Sipas kryediplomatit iranian, Turqia “bisedoi me amerikanët dhe adoptoi një qëndrim shumë të fortë” në lidhje me këtë çështje, duke ndihmuar në shmangien e planit. Këto komente pasojnë pretendimet e mëparshme të Trump-it, i cili kishte deklaruar se i kishte kërkuar Presidentit turk Recep Tayyip Erdogan të qëndronte jashtë konfliktit me Iranin.
Presidenti iranian Masoud Pezeshkian deklaroi të hënën se vendi është në një “luftë në shkallë të gjerë” pas sulmeve amerikane në territorin iranian. Si kundërpërgjigje, Garda Revolucionare e Iranit njoftoi se ka sulmuar objektiva ushtarake amerikane në Jordani dhe një qendër komanduese në al-Tanf të Sirisë.
Ndërkohë, Irani vazhdon të kryejë sulme ndaj grupeve të armatosura kurde në Kurdistanit irakian. Të premten, të paktën nëntë anëtarë të Partisë Komala të Punëtorëve të Kurdistanit u vranë në një sulm të dyshuar me raketa në provincën e Sulaimaniyah. Turqia, e cila përballet me konfliktin e saj me militantët kurdë, nuk ka dhënë ende një përgjigje zyrtare ndaj këtyre pretendimeve.
Burimi: al-monitor.com