CEO-ja i Nvidia-s, Jensen Huang, ka publikuar një letër të hapur në mbështetje të modeleve të inteligjencës artificiale me peshë të hapur, të cilat mund të shkarkohen, shikohen dhe modifikohen nga çdo përdorues. Sipas letrës, këto modele janë thelbësore për ta bërë inteligjencën artificiale më të arritshme dhe më të përshtatshme për përdorim të gjerë.
Edhe OpenAI, kompani e cila deri më tani është fokusuar kryesisht në modele të mbyllura, ka shprehur mbështetjen e saj për këto qëndrime.
Kompanitë nënshkruese po bëjnë thirrje për hapje në zhvillimin e inteligjencës artificiale për të nxitur inovacionin, duke kundërshtuar njëkohësisht vendosjen e kufizimeve të parakohshme nga qeveritë. Administrata e Presidentit Trump ka shfaqur kohët e fundit interes për të marrë një rol më aktiv në vlerësimin e modeleve të inteligjencës artificiale dhe në vendimmarrjen mbi kohën e publikimit të tyre.
Në një zhvillim paralel, Shtëpia e Bardhë ka akuzuar Kinën për vjedhje në shkallë të gjerë të pronës intelektuale nga kompani amerikane. Akuzat lidhen me kompaninë kineze Moonshot AI, e cila dyshohet se ka përdorur të dhëna nga modeli i mbyllur Fable 5 i Anthropic për të zhvilluar modelin e saj të hapur, Kimi K3. Moonshot AI i ka mohuar këto pretendime.
Ai paralajmëroi se për firmat kineze që kryejnë distilim të fshehtë të teknologjisë, mund të vendosen sanksione dhe përfshirje në listat e entiteteve të kufizuara.
Aktualisht, Anthropic dhe Google nuk kanë dhënë komente zyrtare lidhur me këtë letër. Ndërkohë, industria e teknologjisë po përpiqet të pozicionohet përballë mundësisë së rregulloreve të reja qeveritare, ndërsa debati global mbi balancën mes inovacionit dhe sigurisë vazhdon të intensifikohet.
Burimi: techradar.com