Shefi i Grupit Parlamentar të Partisë Demokratike të Kosovës, Abelard Tahiri tha se kryeministri Albin Kurti po e trajton në mënyrë të veçantë pjesën veriore të vendit.
Sipas tij, shefi i Ekzekutivit e ka një agjendë. Tahiri kritikoi Qeverinë për mospërfshirjen e veriut në shtrenjtimin e rrymës në seancën e jashtëzakonshme ku po diskutohen tarifat e reja.
Ai theksoi se e sheh këtë si zgjerim të një autonomie për veriun. I pari i deputetëve të PDK-së e akuzoi Zyrën e Rregullatorit për Energji se po vepron si organ politik dhe jo i pavarur. Abelard Tahiri i kërkoi Albin Kurtit që ta shkarkojë borin e ZRRE-së.
“Fatkeqësisht Qeveria dhe Albin Kurti është duke e trajtuar në mënyrë të veçantë veriun. Dhe unë mendoj që tash po shihet që Albin Kurti e ka një agjendë për veriun. Pra këtu kemi të bëjmë pikërisht me zgjerimin e një autonomie me angazhimin e kësaj qeverie që këta njerëz ta kenë një autonomi pikërisht në atë pjesë të vendit. Kjo është jashtëzakonisht e dëmshme dhe kjo është arsyeja pse Albin Kurti nuk guxon me marrë pjesë në seancë, sepse nuk ka arsyetim pikërisht për veriun”.