Disa korridore humanitare në Ukrainë, duke përfshirë ato nga qyteti port i rrethuar jugor i Mariupol dhe nga Zaporizhzhia, janë hapur sot, sipas zëvendëskryeministres Iryna Vereshchuk.
Ajo shtoi se shpresonte se Rusia do t’i respektonte premtimet e saj për një armëpushim, shkruan Sky News.
Vereshchuk tha se Ukraina ka planifikuar të evakuojë banorët e disa qyteteve dhe fshatrave në rajonet e Kievit dhe Sumy-t dhe disa zonave të tjera ku ka luftime të vazhdueshme.
“Shpresoj që dita të shkojë mirë, të gjitha rrugët e planifikuara do të jenë të hapura dhe Rusia do të përmbushë detyrimet e saj për të garantuar regjimin e armëpushimit”, tha ajo në një fjalim video.
Përpjekjet për të siguruar kalim të sigurt për banorët e Mariupolit kanë dështuar vazhdimisht këtë javë.