Ambasadori amerikan në Prishtinë, Jeff Hovenier deklaroi se është i nderuar që u ftua nga kryetari i Komisionit për Punë të Jashtme dhe Diasporë, Haki Abazi për të diskutuar çështje të përbashkëta, raporton Paparaci.
Ai pas këtij takimit i cili u mbajt me dyer të mbyllura tha se kishin diskutim të frytshëm për sigurinë nacionale dhe çështje të politikës së jashtme.
Ndërkohë, në konferencën e përbashkët për media, Haki Abazi nga Lëvizja Vetëvendosje u shpreh se u rikonfirmuan lidhjet speciale dhe strategjike mes Kosovës dhe ShBA-së.
Ai shtoi se rruga euro-atlantike do të vazhdojë.
“Komisioni ynë është platformë e hapur dhe miqësore që të dëgjojmë edhe këshillat e ShBA-së”, theksoi ligjvënësi i pushtetit.
Takimi mes Hovenier dhe anëtarëve të Komisionit për Punë të Jashtme u mbajt në një sallë të Kuvendit të Kosovës, e cila filloi në ora 10:30.