Një aktivist i Lëvizjes Vetëvendosje nga Skenderaj është arrestuar për një vjedhje të rëndë të kryer në një shtëpi në Polac, fshat në të cilin banon.
I arrestuari, siç mëson Paparaci nga burime brenda organeve të rendit, është Ardian Koci.
Bashkë me të, për rastin e vjedhjes së kryer në 6 mars të këtij viti, janë arrestuar edhe tre të tjerë.
Vjedhja e një shume të konsiderueshme të parave dhe stolive të arit kishte ndodhur në 6 mars të këtij viti në një shtëpi në Polac. Ndërsa, katër të dyshuarit janë arrestuar mbrëmjen e të enjtes.
“Lidhur me rastin më datë 09.05.2024 njësiti i hetuesisë ka arritur të identifikoj dhe arrestoj katër të dyshuar meshkuj kosovarë”, tha Policia e Kosovës në raportin 24 orësh.
Policia tha se një veturë dhe disa veshmbathje janë sekuestruar si prova materiale.
Sipas raportit të Policisë së Kosovës në datën 7 mars, vjedhja kishte ndodhur në një shtëpi të fshatit Polac.
“Ankuesi mashkull kosovar ka njoftuar se të dyshuar të panjohur nga shtëpia e tij i kanë vjedhur para dhe ari (që të dyja në vlerë të konsiderueshme)”, thuhej në raportin e Policisë një ditë pas kryerjes së vjedhjes.
Ardian Koci në një takim me Hysni Mehanin, kryetarin e Degës së LVV-së në Skenderaj dhe kryeministrin Albin Kurti
Paparaci, ka mësuar se Ardian Koci është një aktivist i Lëvizjes Vetëvendosje dhe djali i ish-kryetarit të nëndegës së LVV-së në Degën e partisë në Skenderaj.
Koci, i dyshuar për vjedhjen e rëndë në bashkëkryerje, është nipi i Ahmet Zabelit, gjeneralit të Ushtrisë Çlirimtare të Kosovës, nga fshati Rezallë e Skenderajt.
I dyshuari i tjetër për vjedhjen e rëndë në Polac është Arbër Gashi, ka mësuar Paparaci. Koci dhe Gashi janë miq me njëri-tjetrin, tregojnë disa fotografi të publikuara në rrjetet sociale.
Ardian Koci dhe Arbër Gashi, të dyshuar për vjedhjen në fshatin Polac
Katër të dyshuarit, me vendim të prokurorit të dyshuarit janë dërguar në mbajtje.