Kryeministri i Kosovës, Albin Kurti, ka pritur në takim Ekrem Bardhën, njërin nga biznesmenët shqiptarë më të suksesshëm në SHBA.
Kurti ka thënë se Bardha ka takuar shtatë presidentë të ShBA-ve, duke filluar me presidentin e 37-të, Richard Nixon, në vitin 1969.
“Deri pasluftës kam menduar që Ekrem Bardha është me prejardhje nga Kosova. Angazhimi dhe kontributi i tij në mërgatë për çlirimin dhe pavarësinë e Kosovës është shumë i madh. Javën e ardhshme ai bëhet 91 vjeçar, por nuk ndalet duke afirmuar e diskutuar për çështjen kombëtare”, ka shkruar Kurti, në një postim në Facebook.
“I arratisur nga Kolonja e Shqipërisë në vitin 1953, Ekrem Bardha arriti të bëhet një ndër biznesmenët më të suksesshëm shqiptar në Shtetet e Bashkuara të Amerikës, dhe bashkëthemelues i Këshillit Kombëtar Shqiptaro-Amerikan”.
Kurti thotë se “Fillet e aktivitetit të tij politik e kanë një moment të posaçëm: njohjen me kongresistin e zonës së tij elektorale në Michigan, William S. Broomfield, që më pas shndërrohet në miqësi për tërë jetën. Gjatë veprimtarisë së tij, z. Bardha ka takuar shtatë presidentë të ShBA-ve, duke filluar me presidentin e 37-të, Richard Nixon, në vitin 1969”.
Kryeministri tha se me Ekrem Bardhën dhe vajzën e tij, Donikën kishte një bashkëbisedim frymëzues gjatë një takimi të përzemërt.