Takimi i parë i Grupit Punues, i cili duhet të merret me zgjidhjen e mosmarrëveshjes midis Kosovës dhe Serbisë për targat, do të mbahet nesër në Bruksel, konfirmoi zëdhënësi i BE-së Peter Stano për agjencinë serbe të lajmeve Tanjug, transmeton Paparaci.live.
“Qëllimi i Grupit Punues është të gjejë një zgjidhje të qëndrueshme për këtë çështje”, ka thënë Stano.
Ai ka deklaruar se Grupi Punues, i përbërë nga ekspertë nga BE, Kosova dhe Serbia, do të takohet rregullisht, siç janë pajtuar në marrëveshjen e 30 shtatorit.
Marrëveshja i dha fund krizës në vendkalimet kufitare midis Serbisë dhe Kosovës dhe rivendosi lëvizjen e lirë, me fillimin e përdorimit të ngjitëseve në targa.
Më pas u arrit marrëveshja për formimin e një Grupi Punues, i cili duhet të arrijë një marrëveshje në gjashtë muajt e ardhshëm për një zgjidhje të përhershme të çështjes së zbatimit ose njohjes së targave midis Kosovës dhe Serbisë.
Gjetjet e Grupit Punues duhet të diskutohen në një takim të nivelit të lartë të dialogut midis Kosovës dhe Serbisë./Paparaci.live.