Anglia ka siguruar kualifikimin në fazën e eliminimit direkt të Kampionatit Botëror 2026, pasi e mbylli Grupin L në vendin e parë. Ky sukses u konfirmua pas fitores 2-0 ndaj Panamasë, të zhvilluar të shtunën në mbrëmje në East Rutherford.
Skuadra e drejtuar nga Thomas Tuchel hyri në ndeshjen e fundit të grupit pas një barazimi 0-0 me Ganën dhe një fitoreje fillestare ndaj Kroacisë. Megjithatë, për shkak të formatit të turneut me 48 ekipe, vendi i Anglisë në raundin e 32-të ishte garantuar që një natë para ndeshjes me Panamanë, pasi rezultatet në grupet e tjera shkuan në favor të tyre.
Kualifikimi u sigurua pasi ekipet e treta në grupet e tjera nuk arritën të kalonin pragun e tri pikëve. Pas fitores së Senegalit ndaj Irakut dhe humbjes së Uruguait ndaj Spanjës, Anglia e kishte të sigurt kalimin tutje përpara se të zbriste në fushë për ndeshjen e fundit.
Në raundin e 32-të, Anglia do të përballet me ekipin e renditur në vendin e tretë nga Grupi I ose K. Aktualisht, kundërshtari i mundshëm është Senegali, por nëse Republika Demokratike e Kongos fiton ndaj Uzbekistanit, atëherë Anglia do të përballet me këtë të fundit.
Nëse Anglia kalon në fazën e 16-shes, ajo mund të përballet me fituesin e Grupit A, Meksikën, në stadiumin Estadio Azteca. Në rast të një fitoreje, kundërshtari i mundshëm në çerekfinale do të ishte fituesi i Grupit C, Brazili.
Më tej, në rrugën drejt finales, Anglia mund të përballet me Argjentinën në gjysmëfinale. Argjentina ka pasur një fillim të mbarë në këtë turne, ku Lionel Messi ka shënuar pesë gola deri më tani.
Burimi: independent.co.uk