Qeveria amerikane po ndjek penalisht qytetarin Sam Tunick, pasi dyshohet se ai u ka dhënë agjentëve federalë një “fjalëkalim detyrimi” (duress password) që fshiu të dhënat e telefonit të tij. Ngjarja ka ndodhur më 24 janar 2025, në aeroportin Hartsfield-Jackson në Atlanta, në momentin kur autoritetet tentuan të konfiskojnë pajisjen.
Megjithatë, një mocion i paraqitur nga avokatët e tij argumenton se ky ndalim ishte thjesht një pretekst për të hetuar lidhjet e Tunick-ut me lëvizjen “Stop Cop City” në Atlanta.
Prokuroria po përdor një statut të rrallë, i cili e bën të paligjshëm shkatërrimin ose dëmtimin e pronës për të penguar autoritetet nga konfiskimi i saj. Sipas akuzës, Tunick përdori një veçori të sistemit GrapheneOS për të fshirë telefonin, duke ofruar një fjalëkalim të rremë në vend të kodit të vërtetë të zhbllokimit.
Mbrojtja pretendon se ndalimi dhe konfiskimi ishin të paligjshme, duke kërkuar që të gjitha provat të hidhen poshtë. Avokatët e Tunick-ut deklarojnë se agjentët nuk i lejuan atij qasje në një avokat, nuk paraqitën një mandat dhe nuk e informuan për të drejtat e tij ligjore.
Qeveria është përgjigjur duke argumentuar se nuk ishte e detyruar të siguronte një mandat, pasi Tunick ende nuk kishte marrë leje për të hyrë në territorin e Shteteve të Bashkuara.
Marlon Kautz, anëtar i “Atlanta Solidarity Fund”, deklaroi se qytetarët kanë të drejtë të mbrojnë të dhënat e tyre private kundër kontrolleve që i konsideron jokushtetuese. Nën administratën Trump, procesi i hyrjes në SHBA është bërë më i vështirë, ku edhe qytetarët mund të përballen me ndalime disa-orëshe dhe shqyrtim të llogarive të tyre në rrjetet sociale.
Burimi: theverge.com