Presidenti i Senegalit, Bassirou Diomaye Faye, ka themeluar një parti të re politike, duke formalizuar ndarjen e tij nga ish-aleati Ousmane Sonko. Ky zhvillim shënon kulmin e tensioneve disamujore mes dy figurave që dikur bashkëpunuan ngushtë, duke hapur një garë për kontrollin e lëvizjes reformiste që i solli ata në pushtet në vitin 2024.
Gjatë prezantimit para mbështetësve, Faye e përshkroi lëvizjen e re si një organizatë të përqendruar te institucionet dhe jo te personalitetet. Ai deklaroi se partia do të udhëhiqet nga parimet e etikës dhe transparencës, duke shtuar se ajo do të jetë e hapur për të gjithë qytetarët, përfshirë të rinjtë, gratë, fermerët, peshkatarët, mësuesit dhe punonjësit shëndetësorë.
Kjo lëvizje vjen pas një periudhe të gjatë tensionesh lidhur me drejtimin e qeverisë dhe menaxhimin e sfidave ekonomike të vendit. Marrëdhënia mes tyre u përkeqësua kur Faye shkarkoi Sonko-n nga posti i kryeministrit në fund të muajit maj dhe shpërndau qeverinë, vendim pas të cilit Sonko njoftoi se partia PASTEF nuk do të merrte pjesë në kabinetin e ri.
Analistët kanë shprehur shqetësime për pasojat e këtij përçarjeje. Kabir Adamu, themelues i Beacon Consulting Ltd, vlerësoi se shkarkimi i Sonko-s ka krijuar një krizë politike, duke paralajmëruar mundësinë e një paralize legjislative dhe paqëndrueshmërie ekonomike. Nga ana tjetër, Mubarak Aliyu, analist i rrezikut politik, theksoi se kjo përçarje mund të ndikojë negativisht në rimëkëmbjen ekonomike të Senegalit, në një kohë kur vendi po përballet me një krizë borxhi.
Për shumë qytetarë senegalezë, suksesi i këtyre dy kampeve politike do të varet nga aftësia e tyre për të përmbushur premtimet për reforma dhe përmirësimin e standardit të jetesës. Benjamin Dwomoh-Doyen, drejtor ekzekutiv i African Chamber of Content Producers, u shpreh se shpreson që udhëheqësit e Senegalit të vendosin interesat e vendit mbi rivalitetet politike.
Burimi: aljazeera.com