Deputeti i LDK-së, Agim Veliu ka ironizuar duke thënë se “Qeveria e shpresës” çdo ditë e më shumë po e tregon fytyrën e vërtetë.
Spas tij, ndodhi greva në sektorin publik dhe kjo qeveri po tregon se është qeveri e ndëshkimit.
Ai tha se po vërtetohet se kryeministri Albin Kurti me kabinetin e tij qëllimisht iu shmang dialogut dhe ndërprerjes së grevës në arsim me qëllim që t’i tregojnë “muskujt” karshi mësimdhënësve.
“Ndodhi ajo që edhe mund të pritej, qeveria e mashtrimit ndëshkoi mësimdhënësit dhe duke mos ua procesuar pagat, i la pa bukën e gojës mbi 20 mijë familje. Në kohën e inflacionit më të lartë që nga paslufta, ngritjes enorme të çmimeve dhe kur qeveria e mashtrimit po paralajmëron dimër të rëndë energjetik, shumica e mësimdhënësve nuk do të marrin paga as në nëntor”, shkroi ish-ministri i MPB-së.
“Pagat e tyre do të jenë peng i bankave, duke paguar dy këste të kredisë e me kamata ndëshkuese. Prandaj, më shumë se kurrë nevojitet reagim dhe presion opozitar e qytetar mbi qeverinë e mashtrimit që pagat e mësimdhënësve të procesohen menjëherë”, përfundoi ai në Facebook.