Qytetarë të shumtë kanë dalur në Beograd e në qytete të tjera të Serbisë, duke kundërshtuar kështu ndryshimet ligjore, që sipas protestuesëve, favorizojnë kompanitë private të cilat po dëmtojnë qytetarët dhe mjedisin.
Kjo protestë vjen pas protestës së javës së kaluar, për të dytën herë me radhë, pikërisht për të njejtën arsye, përcjell Paparaci.
Ndërkaq, qytetarët serb protestojnë kundër vendimeve të fundit të autoriteteve për të ulur pragun e referendumit dhe për të lejuar shpronësimin e shpejt të pronës private, nëse autoritetet e vlerësojnë se është në interes të publikut.
Këto protesta vijnë pas dekadash të neglizhencës, pasi Serbia përballet me probleme të mëdha mjedisore siç janë ndotja e ajrit dhe ujit, menaxhimi i dobët i mbeturinave dhe çështje të tjera.
Protesta më 4 dhjetor nisi në ora 14:00, teksa protestuesit bllokuan trafikun në një autostradë në Beograd si dhe një urë në Novi Sad, ndërkaq bulevardi kryesor i Novi Sadit u bllokua pjesërisht.
Tubime të ngjashme po mbahen edhe në qytete të tjera të Serbisë.
Para nisjes së tubimeve, Ministria e Brendshme serbe paralajmëroi se bllokimet e rrugëve janë të jashtëligjshme.
Presidenti i Serbisë, Aleksandar Vuçiq ka thënë se nuk do të ndërmerren veprime ndaj protestuesve “për aq kohë sa ata nuk vënën në rrezik jetën dhe pronën e qytetarëve dhe institucioneve”.
Më 27 nëntor, mijëra protestues bllokuan rrugë dhe ura në Beograd, Novi Pazar, Zrenjanin, Shabac, Kragujevc dhe qytete të tjera serbe.
Disa protestues u arrestuan gjatë këtyre protestave.
Protestat e grupeve të aktivistëve të mjedisit kundër kompanisë Rio Tinto në Lloznicë, më 27 nëntor, 2021. Disa protestues mbajnë në duar pano ku shkruhet “hajnat” dhe “tradhti”.
Protestave, që po organizohen nga organizata joqeveritare, u janë bashkuar edhe përfaqësuesit e disa partive opozitare dhe shoqatave lokale.
Grupet e mjedisit dhe organizatat e shoqërisë civile argumentojnë se ndryshimet e fundit ligjore në Ligjin për Shpronësim dhe Ligjin për Referendum do të hapin rrugën për kompanitë e huaja për të anashkaluar pakënaqësitë e qytetarëve për projektet, siç është edhe projekti i kompanisë Rio Tinto që ka nisur ndërtimin e një miniere të litiumit në perëndim të Serbisë.
Autoritetet serbe kanë hedhur poshtë akuzat, duke thënë se ligjet e miratuara ishin të nevojshme për shkak të projekteve infrastrukturore.
Vuçiq është shprehur se do të mbahet referendum lidhur me minierën e Rio Tintos.
Ekspertët kanë paralajmëruar se ndërtimi i minierës së litiumit në perëndim të Serbisë, do të shkatërronte tokat bujqësore dhe do t’i ndoste ujërat.
Kompania Rio Tinto ka thënë se do të respektojë të gjitha ligjet serbe dhe ka mohuar se projekti për minierën rrezikon mjedisin. /radioevropaelire