Koalicioni PDK-LDK nuk do të ketë dorë më në ndërmarrjen publike komunale në Prishtinë. Përfaqësuesit e tyre në Komisionin Komunal të Aksionarëve janë shkarkuar sot nga opozita. Në vendin e aksionarëve të shkarkuar, janë emëruar asamblistë të opozitës LVV-AAK-Nisma.
20 aksionarë të dhjetë ndërmarrjeve publike komunale në Prishtinë janë shkarkuar sot në një mbledhje të jashtëzakonshme të Kuvendit Komunal.
Aksionarët e ndërmarrjeve komunale janë shkarkuar me votat e Lëvizjes Vetëvendosje dhe AAK-së, dy partive opozitare. Pro shkarkimit të tyre ka votuar edhe Endrit Zabërgja, asamblisti i Nismës në Kuvendin Komunal të Prishtinës.
20 aksionarët e shkarkuar mbanin pozita në dhjetë ndërmarrje publike komunale. Ata ishin asamblistë të koalicionit qeverisës mes LDK-së dhe PDK-së në Prishtinë.
Shkarkimi i tyre është bërë me votat e opozitës së përbërë nga Lëvizja Vetëvendosje dhe Aleanca për Ardhmërinë e Kosovës.
Në media ditëve të fundit është raportuar se zhvillimet e ditës së sotme rrezikojnë ta shpërbëjnë përfundimisht koalicionin, tashmë të lëkundur, mes LDK-së dhe PDK-së.