Armand Duka është bërë shqiptari i parë që arrin një post të lartë në organet e futbollit ndërkombëtar. Duka është zgjidhur zëvendës-president i UEFA-s.
Pas këtij vendimi nga organi më i lartë në futbollin evropian, ka ardhur edhe reagimi i kreut të futbollit shqiptar.
Duka ka thënë se ndihet shumë i nderuar që i është besuar ky post, por edhe që është një vlerësim i madh për sportin shqiptar.
“Dua të ndaj me ju lajmin se nga sot më është besuar detyra e Zëvendës Presidentit të UEFA-s. Ndihem shumë i nderuar nga ky besim që më ka dhënë komiteti i futbollit evropian. Ky është padiskutim një privilegj i madh për mua por në të njëjtën kohë është dhe një vlerësim i madh që i bëhet futbollit shqiptar e punës së madhe që është bërë në këto vite.
Komuniteti i futbollit shqiptar sot ka një vend në drejtimin e futbollit evropian dhe së bashku do të japim kontributin tonë për mbarëvajtjen dhe strategjitë zhvillimore të futbollit në të gjithë Evropën”, ka thënë fillimisht kryetari i FSHF-së.
Përpos zgjedhjes së tij në postin e ri, Duka është deklaruar edhe për organizimin e Kampionatit Evropian për grupmoshat U-17.
“26 shtatori 2023 do të mbetet një datë historike për futbollin shqiptar dhe jo vetëm sepse familja e madhe e futbollit evropian, UEFA, na besoi organizimin e Kampionatit Evropian për 17 vjeçarët në vitin 2025-të. Ky Kampionat Evropian është pa diskutim organizimi më i madh në historinë e futbollit tonë dhe duhet të jemi shumë krenar që pas organizimit të suksesshëm të shumë aktiviteteve evropiane tani na u besua një kompeticion kaq prestigjioz.
Përpara kemi shumë punë, na presin sfida të rëndësishme, por së bashku me Qeverinë shqiptare, Ministrinë e Arsimit dhe Sportit, Bashkitë e qyteteve që do të mirëpresin këtë kompeticion, do të arrijmë të bëjmë një organizim të shkëlqyer që do të nderojë Shqipërinë dhe futbollin tonë”, përfundoi Duka.