Fatmir Limaj ka thënë se tre deputetët e Nismës Socialdemokrate nuk do të ndryshojnë qëndrim për Albulena Haxhiun, të propozuarën e Lëvizjes Vetëvendosje për kryetare të Kuvendit të Kosovës.
Limaj tha se beson që ekziston përkushtimi për ndërtimin e institucioneve, por u shpreh se gjatë dy ditëve të fundit nuk ka ndodhur asgjë e re në drejtim të një marrëveshje politike për konstituimin e Kuvendit.
“Përkushtimi besoj që është për të ndërtuar institucionet. Derisa nuk ka ndryshim të gjendjes, sjellja jonë në parlament do të jetë e njëjtë me atë që ka qenë deri më tani”, tha ai.
Kreu i Nismës harroi se sa ka shkuar numri i vazhdimit të seancës konstituive.
“Nuk besoj që ka ndodhur dje diçka e re.. sa janë ba.. 26, a sa? Tash e 26-të herë që po bëhet propozimi për kryetar. Ajo çka mund të them unë është: sido që të jetë, vendi duhet të ketë një shumicë parlamentare. Nisma e ka ofruar një mundësi për faktin se vendi duhet të ketë institucione, pavarësisht se si bëhen ato”, tha ai.