Tim Steiner, bashkëthemeluesi i kompanisë britanike të teknologjisë Ocado, ka përfituar gati 100 milionë funte në shpërblime që nga listimi i kompanisë në bursë në vitin 2010. Analiza e raporteve të kompanisë nga grupi "High Pay Centre" tregon se Steiner ka marrë 94 milionë funte, shifër kjo që përfshin gati 59 milionë funte vetëm për vitin 2019, kryesisht si rezultat i marrëveshjeve për shitjen e teknologjisë së mbledhjes së produkteve ushqimore te supermarketet e huaja.
Paddy Goffey, kreu i kërkimeve në "High Pay Centre", deklaroi se trajektorja e pagave të Steiner ilustron një problem më të gjerë në sistemin e shpërblimeve për drejtuesit në Mbretërinë e Bashkuar. Sipas tij, kompensimi shpesh formohet nga shpërblime të mëdha dhe të rastësishme, në vend që të lidhet me performancën reale. Kjo situatë ka ngritur shqetësime lidhur me proporcionalitetin dhe llogaridhënien në procesin e përcaktimit të pagave.
Ndërkohë, bordi i Ocado-s po shqyrton të ardhmen e Steiner. "Sky News" raportoi se bordi ka kontaktuar Niklas Heuveldop, shefin ekzekutiv të Vonage, për një zëvendësim të mundshëm. Kompania deklaroi se bordi angazhohet rregullisht në planifikimin afatgjatë të trashëgimisë dhe në komunikim me kandidatë potencialë. Burime pranë kompanisë sugjerojnë se procesi mund të jetë iniciuar nga kryetari i bordit, Adam Warby, i emëruar në dhjetor 2024, nën presionin e rënies së çmimit të aksioneve.
Aksionet e kompanisë kanë rënë me më shumë se 90% në pesë vitet e fundit, duke zbritur në 172 peni, nën çmimin e listimit prej 180 peni në vitin 2010. Ndërsa disa aksionarë të mëdhenj, si Jörn Rausing, mbeten mbështetës të Steiner, të tjerë janë të ndarë lidhur me qëndrimin e tij në krye të kompanisë. Një burim i brendshëm theksoi se largimi i tij nuk do të pritej mirë nga menaxherët e lartë, të cilët vlerësojnë progresin e kompanisë në zhvillimin e teknologjisë.
Burimi: theguardian.com