Kreu i AAK-së, Ramush Haradinaj, ka reaguar pasi ambasadori i Kosovës në Kroaci, Martin Berishaj, po dyshohet që është i implikuar në një skandal financiar në Slloveni, teksa i është drejtuar kryetarit të ekzekutivit me disa pyetje e kërkesa.
Ai e ka pyetur kryeministrin Kurti se për çfarë arsye ambasadori është përfshirë në një skandal financiar në Slloveni.
Madje, deputeti Haradinaj po kërkon nga shefi i qeverisë që të sqarohet rreth kësaj çështjeje.
“Pse njeriu yt po përflitet të jetë pjesë e skandalit financiar të një kompanie mafioze energjetike? Fol Kryeministër. Shpjegoja popullit ku je ti në këtë histori?”, ka shkruar Haradinaj në Facebook.
Ish-kryeministri ka shtruar edhe disa pyetje publike për Kurtin që lidhen me sektorin e energjisë në vend.
“Pse po dështon ndërtimi i kapaciteteve të reja energjetike në Vend?
Pse ka dështuar Kosova C?
Pse ka dështuar Kosova e Re?
Pse ka dështuar remonti i termocentraleve i paraparë të kryhej gjatë verës?
Pse janë paguar dhjetëra milionë për blerjen e rrymës me çmime astronomike gjatë dimrit?
Pse paguhen dhjetëra milionë të tjerë për rrymën e vjedhur në veri?
Pse është refuzuar gazi amerikan?
Pse e ke refuzuar komisionin hetimor për blerjen e energjisë?”.