Policia e Kosovës ka nënshkruar një kontratë, që parashihet të kushtojë deri në 124 mijë euro, për marrjen me qera të “makinerive të rënda” nga një kompani private që merret me thyerjen e gurit.
Kontrata mes Policisë së Kosovës dhe kompanisë private All Stone Sh.p.k., me bazë në Obiliq, është lidhur të hënën përmes një procedure urgjente të prokurimit, bazuar në të dhënat e publikuara në platformën e-prokurimi.
Marrëveshja e lidhur mes palëve ka një çmim të peshuar prej 175.40 euro, derisa kontrata është paraparë të kushtojë deri në 124 mijë euro, raporton Paparaci.
Sipas kontratës, Policia e Kosovës do të marrë me qera “makineri të rëndë” nga kompania All Stone Sh.p.k.
All Stone Sh.p.k. është kompani private e cila vepron në fushën e aktiviteteve minerare. Merret me thyerjen e gurit, ndërkaq si aktivitet sekondar në Agjencinë për Regjistrimin e Bizneseve ka prezantuar tregtinë me shumicë të veshjeve dhe këpucëve.
Kompania, sipas të dhënave publike në ARBK, figuron të merret edhe me demolimin e objekteve, ndërtimin e rrugëve dhe autostradave etj.
Megjithatë, të dhënat e publikuara në platformën shtetërore e-prokurimi, nuk tregojnë detaje mbi marrëveshjen mes palëve. Nuk dihet se cilat pajisje “makineri e rëndë” do t’i shfrytëzojë me qera Policia e Kosovës. /Paparaci.com
