Deputeti i AAK-së, Shemsedin Dreshaj, ka thënë se kjo që po ndodh me arsimin në Kosovë, nuk mbahet mend të ketë ndodhur ndonjëherë pas luftës.
Kjo po ndodh sipas tij, si pasojë e njerëzve të paaftë në qeverisje. Dreshaj ka thënë se Qeveria Kurti po bën lojë me emocionet e fëmijëve dhe me skamjen e familjarëve e gatishmërinë e mësimdhënësve.
“Dështimi i radhës i qeverisë, lajm i hidhur për nxënës, prindër e mësimdhënës. A thua pse edhe sivjet lojë me emocionet e fëmijëve, me skamjen e familjarëve dhe me gatishmërinë e mesimdhënësve, përkundër shumë pakënaqësive, që ky vit të fillojë me kohë. Cilat qenkan prioritetet menaxhuese të këtij vendi: shkollat e parinovuara, tekstet mësimore te pakontraktuara, mësues e nxënës në shtëpi. Kjo nuk ka ndodhur asnjëherë pas lufte e madje as gjatë viteve të okupimit, viteve të 90-ta. Krejt kjo si pasojë e paaftësisë së njerëzve që sot qeverisin me vendin”, ka thënë Dreshaj.
Ai ka shtuar se qeveria Kurti e ka vrarë shpresën dhe ardhmërinë e rinisë.
“Si duket arsimin e kemi shumë mirë. Ky vend nuk paska nevojë për shkolla, as për tekste mësimore e madje as për mësimdhënës. Arsimi lehtë shkatërrohet, por vështirë riparohet. E vrave shpresën dhe ardhmërinë e rinisë, populli dhe vendi gjykohen në vdekje. Ju lus veproni, me fëmijë nuk bëhet eksperiment”, është shprehur Dreshaj.