Deputetja e PDK-së, Ariana Musliu- Shoshi ka reaguar në lidhje me paralajmërimin e ministres së Punëve të Jashtme, Donika Gërvalla, për ndëshkime brenda MPJ-së.
Musliu-Shoshi i është drejtuar Gërvallës duke i thënë se “dështimin tënd në politikën e jashtme; skandalet e vazhdueshme, asnjë njohje e asnjë anëtarësim NUK mund ta justifikosh me një referat me anë të të cilit po paralajmëron spastrime politike brenda Shërbimit të Jashtëm, duke shkelur ligjet në fuqi e duke e de-funksionalizuar edhe më tej diplomacinë tonë”.
Tutje, ajo ka thënë se ndryshimet e brendshme është dashur të jenë të përfunduara deri më tani, e jo tek të fillojnë.
“Projektligji për Ministrinë e Punëve të Jashtme, Projektligji për Shërbim të Jashtëm e ai për Disaporë është dashur të vie në Kuvend qershorin e kaluar, akoma s’kanë ardhur”, tha Musliu-Shoshi.
Po ashtu, ajo ka thënë se Ministria e Punëve të Jashtme dhe ish Ministria e Diasporës është dashur të jenë të fuzionuara deri më tani, “por akoma s’ka as organogram të unifikuar”.
“Ky postim i fundit i joti është tregues i qartë që deri më tani, e gjithë çka është bërë nga MPJD nën lidershipin tënd nuk kanë qenë reformat, por identifikimi i ‘kundërshtarëve’ për t’i goditur ata më pas”, ka thënë ajo.
“Pozita e shefes së diplomacisë nënkupton bërjen dhe udhëheqjen e politikës së jashtme të vendit, e jo mikromenaxhimin e brendshëm për të qëruar hesape me ata që mendojnë ndryshe”.