Nëse dikush do të kërkonte dy simbole të qeverisjes së Albin Kurtit në infrastrukturë, duket se nuk do t’i duhej të kërkonte gjatë. Njëra është ura e Saradranit, e përuruar me ceremoni e postime triumfuese tre vjet më parë, ndërsa tjetra është vada e ujitjes në Lupq, i prezantuar sot me po aq entuziazëm institucional.
Në Saradran, një rrugë prej rreth dy kilometrash dhe ura mbi Drin u shndërruan në një ngjarje kombëtare. “Saradrani kalon”, njoftonte kryeministri, duke e paraqitur lidhjen mes dy fshatrave si një moment historik.
Tre vjet më vonë, në Lupq, ministri në detyrë Armend Muja dhe kryetari i Podujevës, Shpejtim Bulliqi, prezantuan një vadë ujitjeje me rënie të lirë. Në epokën e sistemeve moderne të ujitjes, sensorëve digjitalë dhe teknologjive inteligjente për bujqësinë, ceremonia kulmoi me hapjen e një dërrase për të lëshuar ujin në kanal.
Pamjet e ceremonisë krijuan përshtypjen se vendi kishte hyrë në një epokë të re zhvillimi, ndonëse bëhej fjalë për një metodë ujitjeje që fermerët e njohin prej dekadash.
